阮兆祥主持的電台節目找來陳慧琳（Kelly）做嘉賓，兩人相識多年，祥仔要撬開Kelly把口話咁易！當玩情境題時問她會向哪男星借100萬，Kelly笑言梁朝偉經常「潛水」，故一定向筍盤郭富城埋手，貪他夠豪爽！
陳慧琳接受阮兆祥主持的電台錄音訪問昨日播出，祥仔先測試她與一眾合作過男星的友情大考驗，問她若然要借錢100萬，會向梁朝偉、郭富城還是梁家輝求助呢？Kelly即大笑：「3個都好似會得喎，100萬對佢哋嚟講濕濕碎啦！」最後選擇向城城埋手，貪他夠爽快，她說：「因為梁朝偉唔似會聽電話，佢匿埋o架嘛，搵極都搵唔到佢嘅。我諗Aaron（城城）會疏爽啲，同佢排舞嗰時成日請食嘢，好大方！同埋同佢關係好似耐啲，拍咗好多部戲，又成日一齊排舞。」祥仔乘機抽水說：「你揀得好，因為其他兩個都結咗婚，可能要徵詢另一半意見，城城剩番啲錢喺度都係買車買馬o架啦！」
金城武做男友
再問她若要揀一個男生扮男友，來試探老公還會否呷醋時，Kelly一聽到金城武的名即「嗒糖」說：「梗係佢，個個女仔都暈晒啦。記得以前去越南做嘢啲嘢食好污糟，惟有拎晒酒店麵包去片場，一到晏晝就等佢帶嚟嗰隻XO醬救命。」她又笑指如果要搵人湊仔，首選鄭伊健，貪對方夠好玩。
而Kelly昨日就到深圳出席美心月餅活動，她表示最喜歡於佳節與一家人食飯聯絡感情，又指不介意帶兩個囝囝上親子電視節目：「可以帶住個仔周圍去應該都幾好玩，不過首要條件係唔能夠影響佢哋返學。」