近期美元表現實在弱不禁風，短短一個月美匯指數由83水平碌落78，再睇十年美債債息仲離譜，息口由年初3.8厘跌到最近2.5厘，換句話，即使每年得2.5%回報，仲有好多人爭住要借錢畀美國政府！
自從八月底，聯儲局主席伯南克表示，萬一美國經濟出現雙底衰退的迹象，將預備以非常手段去應對，講來講去，又係開動印銀紙機提供流動性嗰一招。伯蛇這位曾在美國普林斯頓大學任教、主力研究一九二九年經濟大蕭條的學者，講到隨時二輪量化寬鬆咁款，市場共識係街上流通銀紙會增加，鈔票嘅購買力一日縮水過一日，或者我哋唔會誇張到用麻包袋裝錢買個麵包，但近期環球金股匯市（指美元以外貨幣），就不斷吸引熱錢流入，甚至有人借錢。
而在股市的矛盾，是情願看到經濟數據偏弱，因為惟有咁樣，美國新增的流動性才會變成我們股市的新流動性，不斷有熱錢湧入支持。上周四，美國第二季經濟增長終值，由1.6%修訂為1.7%，股市興奮咗半個鐘頭，道指升過百點後竟然可以倒跌，就係咁原因。假期期間，中國公布九月份PMI靚絕，中港股市會否因為驚加息，在第三季結完成後來個反高潮，今日將會水落石出。
近半年，內銀、內房、資源、石油股都因為中央政策左右而無運行，資金一窩蜂擁入內需股。上星期，紙巾生產商維達（03331）批股，合共配售3,250萬股，配股價介乎9.2至9.5元，僧多粥少下，反應相當熱烈，這由上限定價可見一二。結果維達不單止批完唔散，仲連日搶高，上周四收報10.94元，創咗上市新高。
基金搶貨爭崩頭
是次配股集資主要是用作擴充產能及提高品牌知名度，扣咗使費加埋本身有400萬股舊股，維達實際集資淨額僅2.64億元，等於市值99.2億元的2.7%，或者已發行股數9.06億股的3.1%，規模細成咁，基金經理唔爭崩頭至出奇。史提芬反而奇怪，管理層點解唔趁市旺要多啲，以本身股本回報率約18至19%，以9.5元批股，意味着大約新股每攤薄1.2%，可令盈利增加4.5%，都算批得過，唔狠狠地批，或者係大股東自視極高，不堪攤薄，又或者行業仲响黃金周期，不急於一時，點都好，筆者已對維達興趣大增。
紙巾和廁紙生意，利潤結構其實幾簡單，原材料紙漿已經佔總成本超過五至六成，餘下一至兩成是推廣及銷售開支，減埋行政及稅項，剩下就係利潤。經營者業績表現，由三方面決定，紙漿成本、品牌溢價高低，以及庫存處理效率。
盈利能力未見頂
維達過去三年，毛利率改善不少，由○七年的20.6%，去到○九年的34.2%（今年上半年是32%），如果用龍頭恒安（01044）的45至46%作為標準，至少在品牌及產品結構上（例如提高高檔次產品比重），維達應該仲有改善餘地。
負責批股的美林就紙漿價格回落，調高咗維達今、明兩年盈利預測去到4.16億元及6.08億元，而綜合街外預測的數字則為4.23億元及5.54億元，相當於6.3%及31%增長，今年股價升幅有限，主要基於紙漿上半年價格高企，一一年預期市盈率18.7倍，似乎股價未完全反映成本見頂回落的好處，加埋批完唔跌，短期要留意。