股票借錢
花旗國噚晚無咩變動，輕微回吐廿幾點散場。今日Ａ仔埸方面，中證監澄清新丁發審工作正常進行，而匯金就澄清根本無話增持建工中三行，不過Ａ仔場反應唔係太大，全日波幅都唔夠５０點，收市微跌０﹒３巴仙三千點關再次得而復失。空歡喜一場後，香江市低開近二百點，之後愈跌愈深，差唔多將噚日逾４百幾點升幅嘔番出來，收市跌３８０點報２０３４１。
噚日香江抽高四百點，成班好友揸定筷子準備食大餐，點知今日就急轉彎；是日立春，魚缸同天氣一樣都係陰陰沉沉，未能感到一絲溫暖。香江結束三連升強勢，就連十天線都守失埋，唯一好彩嘅，係成交少過噚日，得６１０億銀。
《福布斯》公布最新一次嘅香江富豪榜，同唔少缸友嘅預期一樣，無咩驚喜地由超人繼續蟬聯，身家就增加５０億美金，達到２１３億美金。上年股場大翻身，「前亞洲股神」四叔荷包亦都腫脹番，身家超過郭氏兄弟排第二位，第四位就係彤叔。
四大地主齊齊上富豪榜，而港島近期推出嘅新盤呎價更加係「萬萬」聲，瑞士佬又拍心口唱好，話樓價兩年升３５％，地主股嘅目標價，比現水位有三成至七成升幅。眼前一切都係咁「美好」，但地主股近期積弱難翻，個市大升佢就升少少，個市跌佢就跌個凸，今日分別插低１巴仙至４巴仙，是否有所啟示？！
跌市總會有奇葩。超人嘅和黃宣布旗下赫斯基能源第四季賺逾３億加元，按年升３８﹒５％，股價就逆市抽高３巴仙。
噚日傳出匯金打算增持三大行、又話阿爺限制錢莊唔可以向發展商借太多錢，有關方面當然係「例牌」否認。今日又有另外一單傳聞，話成個１月份喺阿爺力壓之下，新增貸款最終只係得番１﹒４萬億至１﹒６萬億左右，估計１月下半月都無咩點增加過貸款出街。
錢莊股今日主要都係跟番個市插低，建行、工行同中行呢三大國有錢莊就跌１巴仙至逾２巴仙；其餘幾行都要跌１巴仙至２巴仙。民行反而一度有得逆市炒上，不過散場都要跌近１巴仙。講開民行，原來噚日佢口地由上午１１點到下午３點半全行系統癱瘓，櫃台、電話銀行、網上銀行郁都郁唔到。
祖國錢莊傳聞多多，本地錢莊方面，券商開始將焦點放落大象身上，皆因下個月１號大象就會派全年成績表。大家都好關注大象過去一年力挽狂瀾的成果，美銀美林發表報告指，估計大象舊年少賺５３巴仙至６２億美金，但花旗國信用卡市場質素改善，相信減值會下降，維持「優於大市」目標價１２３銀。瑞信亦投下信任一票，仲大升目標價至１０６銀，以反映收入比預期轉佳。可惜大象難逃跟市一跌的厄運，今日跌逾２巴仙失守８４銀。中銀香港計劃發行１０年期美金後償票據，券商反應唔錯，畀「ＢＢＢ＋」至「Ａ１」評級，股價逆市升逾３巴仙。
大美人噚日午飯時間派省鏡成績表後股價大升，大摩頭同高盛都出報告力撐，今日股價都算頂得住，微跌０﹒３巴仙。聯想有樣學樣，又係午飯時間派成績表，首九個月多賺兩倍成績彪炳，下半場開波跌幅全消，散場升０﹒２巴仙。
最近不斷有消息都話阿爺要收緊二套房嘅信貸，不過「蛇有蛇路」，據聞錢莊為求做生意，好多時都會「擦邊球」式放貸，但係聽講上海方面呢類做法已經全面叫停，一定要有四成首付，係利率折扣仲可以去到７﹒１折。不過阿爺打壓亦打擊唔到祖國地主入貨嘅意欲，之前投到上海灘地王嘅上海証大話正積極同潛在投資者進行磋商，齊齊合作搞好塊地，今日復賽就炒高逾６巴仙。
其他地主亦有消息，中渝置地副主席被指向前重慶公安局副局長文強賄賂，公司已經發聲明否認，不過股價仍然插低３巴仙。噚日升過一轉嘅恆大，原來係主席押股票借錢後再增持番股份，不過今日就回吐近６巴仙。
今日有幾間細公司開行個抽水機。中國澱粉以每股１﹒４銀配股集資近４億銀擴充產能，折讓約１９％，今朝曾經穿過配股價，埋單大瀉逾１８巴仙收１﹒４１銀險守配股價。另外航天以１﹒１３銀配股籌超過５億發展海南發射場，今日就守得住配股價，跌逾９巴仙收１﹒１６銀。
另外，又有兩隻股仔逆市創奇蹟，分別係半新丁美克國際同中亞能源，前者炒高近６巴仙兼創埋上市新高，後者錄得近４億銀成交，同樣漲近６巴仙散場。
「國際大鱷」索羅斯嚟咗香江，佢噚晚出席香港大學活動，講到佢嘅投資秘訣。當年佢係「戮泡」專家，最鍾意借住泡沫爆破去搵大錢。佢自己就話，見到泡沫形成就要立即去買相關股票，順勢而行，不過幾時沽呢？佢話佢老人家都唔係咁易睇得出。
還有更多借錢討論就在888借貸網、5880借貸網、money-news錢訊借錢網，歡迎大家常常前來查詢。
